Edikto de Granada: Artíkolos Sefárdica

El Edikto de Granada, yamado también Dekreto de Alhambra, fue emitido el 31 de marso de 1492 i ordenaba la ekspulsión de los djudios de la Espanya para el 31 de djulio del mizmo anyo.¹ Siékolos después, el edikto fue boltado atrás.²

Lo ke susedía antes

La Inkisisión avía empesado ase más de dodje anyos. Los reyes pensavan que era buena lavor porke avían topado kon munchos «kulpables». Ama para los Reyes Katólikos (Isabela I de Kastilya i Fernando II de Aragón) kedavan los djudios (djudíos ke avían morado en Espanya asta al momento) komo problema.³ En primero estavan los konversos ke eran kristianos ama con kostumbres, tradisiones i lavoros jeneralmente djudios⁴, después estavan los djudios anusim, ke eran djudios en sekreto ama dezían ser kristianos (yamados marranos komo insulto)⁵, i estavan ansimizmo los públikamente djudios.⁶ Los Reyes Katólikos kreían que los djudios manchavan la fe katólika i a estos kristianos ke se avían ambezado o tenían kostumbres djudias komo «malos kristianos […] pervertidos i enganyados.»⁷ Ordenaron a ke se empesara el Tribunal del Santo Ofisio de la Inkisisión en 1478 para topar kon los konversos, los anusim i los musulmanos por de detenerlos i/o kastigarlos.⁶ Los reyes pensavan ke la raíz de toda la korrupsión era la konbivensia (del kaselyano convivencia) entre los kristianos i djudios. Dechidieron en 1480 embiar a los djudios a «djuderías» – partes de la sivdad ande morarían los djudíos en separasión de los kristianos. El buto de esto era ke ya no tuvieran kolaborasión, sihá, relasión i komunikasión los djudios i kristianos; era para ke los djudios no «danyaran» la relijión katólika. Indemás, la iglesia kreía ke era malo ke los kristianos tuvieran kostumbres djudías, komo la milá de los ombres i las kostumbres de los shomer shabat en jeneral. Todas estas leyes i estos ediktos ke los reyes publikaban no detenían su problem de konversos i djudíos.⁸

Antes unos meses, en el 2 de enero de 1492, la reyna Isabel I de Kastilya i el rey Fernando II de Aragón avían rekonkistado a Granada de manera polítika, puesto ke el Emirato de Granada ya estava basho kontrol de Kastilya. Komo era la última mediná musulamana de la Penínsola Ibérika, el rey de Granada achetó entregar Granada basho algunas kondisiones.⁹ Estas kondisiones inkluían kosas komo que los musulmanos fueran djuzgados de akodro a su ley asta la garantía de ke todos los sivdadinos de Granada podían vender sus tierras.¹⁰ Lo más importante es ke permitían la libertad de relijión en Granada.¹¹

Después tres meses, los Reyes Katólikos pregonaron el Edikto de Granada.¹

El edikto

El edikto ordenava:

La ekspulsión de todos los djudios de las tierras de los Reyes Katólikos, sin importar su edad o ke fueran djentes kon influensia polítika;
No era permitido a los djudios tornar por ninguna razón;
Tenían asta el 31 djulio de 1492 (kalendario Djuliano) para salir;¹²
No podían musulmanos o kristianos dar ayudo ni tener kontakto kon djudios después de la data de ekspulsión;
Tenían asta la data de ekspulsión para vender, trocar, dar, ets. sus kosas;
Podían yevar todo lo ke pudieran via mar o tierra fuera de la Espanya i Aragón i sus tierras, ama no podían yevar monedas, kosas ke ya avían dado a otras personas en trokes i otras kosas ke no tenían permetido yevar.

Para poder kedarse en Espanya, los djudios devían azer el bautismo i en el proseso, konvrertirse al kristianismo. Si se kedavan i no se konvertían, pagarían kon la pena de muerte i la inkautasión de sus bienes. Ansimizmo, las personas que dieran ayudo a los djudios pasada la data de ekspulsion perderían sus bienes i la proteksión de la Korona.¹³

La ekspulsión

No importava ke fueran personas kon influensia polítika o ekonómika ni sus kontaktos – nada aría ke los Reyes Katólikos detuvieran el edikto. Ama un Isaac Abranavel, muy riko i relijiozo djudío «de pirón» komo se dize, era tesorero de los Reyes i de los pokos ke tenían komunakasión direkta con los reyes.¹ Abranavel aprovó avlar kon los reyes para ke no ekspulsaran a los djudios asta kon soborno, kosa ke kaji logra.¹⁴ Finalmente, los reyes dechidieron trokar la data de ekspulsión del 31 de djulio al 2 de agosto. Esta data no fue eskojida sin razón. Ese anyo (i en el kalendario Djuliano), el 2 de agosto estava en el mizmo día que el 9 de Av. EL Tisha b’Av (en ibrit תשעה באב), era el día de la destruksión de los dos Templos de Yerushalayim. ¹⁵ La ekspulsión de los sefaradíes era una trajedia i la data lo amostrava.¹⁶

Los sefaradíes fueron a morar en munchos lugares por la ekspulsión. Ama ubo una mediná, o mijor dicho, imperio, ke arrekojió la mayoría de los djudíos sefaradíes. MIsmo ke algunos en su korte dizían ke no,¹⁷ el Sultán Bayezid del Imperio Otomano los arrekojió a los sefaradíes. Por orden suya, los djudios fueran yevados direktamente al imperio, espesialmente a Estambol, Salonik, Izmir i Sáfed.¹⁸

El número eksakto de kuántos djudios ke se konvirtieron al kristianismo i kuántos dechidieron partir no se save.¹⁹

Afilú de las trajedias, la istoria sefaradí no se detuvo ni fue eliminada. El Edikto de Granada fue el empesijo de un muevo kapítulo en la istoria sefaradí. Munchas famiyas en todo el olam – desde el Mediterráneo a Evropa i asta Amérika Latina tienen un pasado en este tráijiko evento siékolos atrás.

Manaderos

1
páj. 248. Menocal, María Rosa. The Ornament of the World. ISBN 0-316-56688-8
2
New York Times. 1492 Ban on Jews Is Voided by Spain; 1492 BAN ON JEWS IS VOIDED IN SPAIN. https://www.nytimes.com/1968/12/17/archives/1492-ban-on-jews-is-voided-by-spain-1492-ban-on-jews-is-voided-in.html.
3
páj. 2. academia.edu. Edicto de Granada. https://www.academia.edu/10982632/Edicto_de_Granada.
4
Encyclopaedia Britannica. converso. https://www.britannica.com/topic/converso.
5
Encyclopaedia Britannica. Marrano. https://www.britannica.com/topic/Marrano.
6
Encyclopaedia Britannica. Spanish Inquisition. https://www.britannica.com/topic/Spanish-Inquisition.
7
páj. 2-3. academia.edu. Edicto de Granada. https://www.academia.edu/10982632/Edicto_de_Granada.
8
páj. 2-4. academia.edu. Edicto de Granada. https://www.academia.edu/10982632/Edicto_de_Granada.
9
pág. 244-245. Menocal, María Rosa. The Ornament of the World. ISBN 0-316-56688-8
10
wikisource.org. Tratado de Granada. https://es.m.wikisource.org/wiki/Tratado_de_Granada.
11
pág. 245. Menocal, María Rosa. The Ornament of the World. ISBN 0-316-56688-8
12
timeanddate.com. The Julian Calendar. https://www.timeanddate.com/calendar/julian-calendar.html.
13
páj. 4-6. academia.edu. Edicto de Granada. https://www.academia.edu/10982632/Edicto_de_Granada.
14
chabad.org. Don Isaac Abravanel – “The Abarbanel”. https://www.chabad.org/library/article_cdo/aid/111855/jewish/Don-Isaac-Abravanel-The-Abarbanel.htm.
15
chabad.org. What Happened on the Ninth of Av?. https://www.chabad.org/library/article_cdo/aid/946703/jewish/What-Happened-on-the-Ninth-of-Av.htm.
16
pág. 249. Menocal, María Rosa. The Ornament of the World. ISBN 0-316-56688-8
17
Jewish Virtual Library. Modern Jewish History: The Spanish Expulsion. https://www.jewishvirtuallibrary.org/the-spanish-expulsion-1492.
18
Anadolu Agency. Ottoman Empire welcomed Jews exiled from Spain. https://www.aa.com.tr/en/culture-and-art/ottoman-empire-welcomed-jews-exiled-from-spain/1220028.
19
pág. 250. Menocal, María Rosa. The Ornament of the World. ISBN 0-316-56688-8